அன்புடையீர் வணக்கம்,

​

இந்தியாவில் இயற்கை உழவாண்மையில் முன்னோடி மாநிலமாக தமிழ்நாடு இயங்கி வருகிறது. கடந்த காலங்களில், உலகளாவிய செயற்கை ரசாயன உரங்கள், பூச்சிக்கொல்லிகள் பயன்பாட்டால், நிலம், நீர், காற்று, என சூழலியல் பாதிப்பு, காலநிலை மாற்றச் சிக்கல்கள், உண்ணும் உணவின் வழியே உடல் நல பாதிப்பு போன்ற சிக்கல்களை மக்கள் வெகுவாக உணர் ஆரம்பித்துள்ளனர்.

​

'நஞ்சில்லா உணவு நமது அடிப்படை உரிமை' பல்லுயிருக்கான சூழலின் அவசியம் மற்றும் உணவின் முக்கியத்தை உணர்த்த, நம்மாழ்வார் ஐயா தன் இறுதி மூச்சு வரை பாடுபட்டார். அவர் தமிழகமெங்கும் பயணம் செய்து உழவர்களை ஒன்று திரட்டும் பணியை செய்து வந்த நிலையில் 2013இல் ஐயாவின் மறைவு, இயற்கை உழவர்கள், சூழலியல் செயல்பாட்டாளர்கள் மற்றும் பொதுமக்களிடையே வெறுமையை தோற்றுவித்தது.

​

இந்த நிலையில் கடந்த ஓராண்டாக நடைபெற்ற தொடர் முயற்சிகளுக்கு பின்னர், இயற்கை உழவாண்மையில் பன்னெடுங்காலம் பயணிக்கும் முன்னோடிகள் மற்றும் இளம் உழவர்கள், அமைப்புகள், சூழலியல் செயல்பாட்டாளர்கள், சமூக ஆர்வலர்கள் இணைந்து 'தமிழ்நாடு இயற்கை உழவர் கூட்டியக்கம்' உருவாக்கப்பட்டது. இயக்கத்தின் முதல் நிகழ்வாக, வரும் 2025 பிப்ரவரி மாதம் 15, 16 நாட்களில் - ஈரோடு மாவட்டம், சித்தோடு பைபாசில் உள்ள டெக்ஸ்வேலி வளாகத்தில் "இயற்கை உழவர் உணவு பாதுகாப்பு மாநாடு" நடைபெற இருக்கிறது.

​​

மாநாடு சிறப்புற நடைபெற உழவர்களுடன் நுகர்வோர்களாகிய நீங்களும் கலந்துகொண்டு உங்கள் அனைவரின் ஆதரவையும் வழங்க வேண்டும் என அன்புடன் அழைக்கிறோம்.